اوشاقلارا مکتوب...

اوشاقلارا مکتوب...

سجاد،فراز،آیدین 

یامان گوَیلومه دوشوبسونوز!  بیلمیرم هاچان او قارانلیق اودالاروان بوراخیلاجاقسینیز!بیلمیرم اوردا هانسی ماهنی لاری،هانسی شعرلری زمزمه ائدیرسینیز دوداقلارینیزین آلتیندا!؟

آدینیزی اینترنت ده آختاریردیم یئنی بیر خبر بولوم دییه!

آدلارینیز فیلتر اولموشدو!

آدینیز یاساقلانیب ساندیم بیر آن! یوخ! آدینیز آزادلیغا اینسانلیغا آرخا دوروب دوشونورم!آخی کافی نئت دن دیشاری چیخدیغیمدا، آدینیزی دوداق آلتی پیچیلتی لاردان ائشیددیم. شهرده آدینیز سئویملی ماهنی لارا چئوریلیب. دیل دن دیله دولانیر! اوچ سرو بویلو ایگید، اوچ اعتیراض یومروغو، اوچ عوصیان چیچه یی! اونلار سیزی تانیرلار،اونلار هاوانین دورغونلوغوندا،بوغونتوسوندا سوسوب و دورسالاردا اورک لرینده سئوگینیزی بویودورلر!

آنجاق دوشونجنیز آراز کیمین آخیر آرامیزدا،ساوالان کیمی اوجالیر غروروموز سیزینله! دوشونجه یه، اوَزگورلویه قالخان قوللاری قول ائتمک اولماز دوشونورم! آزادلیغا جکیلن زیندانلارا دوزمه یه نه وار؟!

آما سجاد!

ائشیتدیم ائوینیزه زنگ آجدیقدا کوینک ایسته ییبسن! اولمایا ... اولمایا اولمایا ایشکنجه آلتیندا قانا بویانیب کوینگین؟! اولمایا دوشونجه نین قاباغیندا دوشونجه لری یوخ قارشینا قویماغا! اولمایا دوشونجه لرین دوشونجه لرینی دلی لدیر! اولمایا اینسانلیق دان، اینسان حاقلاریندان دانیشماغین هزینه لری اولکه میزده قانلی کوینک لر اولوب ! هادیر اول ، کوینه یینی آلیب آتانا گوندرمه سین لر! یوسیفین کوینه یینی آتاسینا گوندر مه یی، بابک لری، بئیرک لری، یوسیف لری خاطیرلادیرسان سجاد !

یالان دئییلدی سنی گوردوکجه، اومود دولاردی پوزلریمه، هیجان دولاردی دامارلاریما !

سن ساوالانین اوزویدون! غرورلو و محکم!

بیلیرم، آیدین و فراز دا سنی گوردوکجه اومودلانیر. بلکه فراز باپیشیب ایکینیزینده اللرینیزدن و اوخویور:بیز اوچ کیشیدیک، اوچ یئمین لی فیشنگ،اوچ اورک، اوچ ساوالان،اوچ اومود،اوچ بابک،اوچ ...

بوینوموزدا آغیر وبال،بوینوموزدا بیر خالقین دردی،بیر خالقین آرزیسی،بیر خالقین اینسانلیغا ساری زوغ آتان بوداقلاری،کیملیگیمیزه دوغرو ایشیق سالان آی گونش!

بیز اوچ کیشی دئیلیک یالنیز! دوستلاریمیز بیزی گوزله ییرلر،خالقیمیزین قوجاقلاریندا ایستی باغری لاریندا گوزلنیریک!بیز چوخوق! بیر باغیش کیمیی دنیزه چئوریلیب سلئه دونه ریک! بیز بیر بویوک دوشونجه ییک،بیر گوزل وطنیک!

سیز تک دئیاسینیز!

هامی میزی توتاقلاییب دوستاقلاماق ایسته ییرسه لر بوتون وطنی دوستاغا چویرمک لری لازیم!

بیز اوقدر چوخوق کی اودار سللول لاردا یئرلشمه ریک،دوشونجه میز کیمی بویوک،او قدر کی بئین لرینه راحاتجاسی گیرمیریک!

احد رحیمی