ایران مطبوعاتی یازیر: "روسییا کوسووونون اینتیقامینی آلیر "

ایران مطبوعاتی یازیر: "روسییا کوسووونون اینتیقامینی آلیر " 

سون گونلرده جنوبی اوسئتییادا باش وئرن حادیثه لر ایران مطبوعاتی نین دا اساس خبرینه چئوریلیب. روسییانین، گورجوستانین و غرب اؤلکه لری نین بو حادیثه  ایله باغلی مؤوقعی نی ایفاده ائدن ایران مطبوعاتی موناقیشه ده رسمی تهرانین واسیطه چیلیک ائتمک ایستگینی ده قاباردمیشدیر. ایراندا فعالیت گؤسترن بیر سیرا کوتلوی اینفورماسییا واسیطه لری جنوبی اوسئتییا موناقیشه سی نین سببلرینی آب (آوروپا بیرلیگی) و آبش(آمریکا)-دا آختارسالار دا، دیگر بیر قروپ مئدیادا ایسه حادیثه  روسیییانین رئگیوندا غربه گوج نوماییشی کیمی دیرلندیریلمکده دیر. 

ایراندا ان چوخ ایزله نیلن و اساسن رسمی خاراکتئر داشییان  "شبکه خبر" تئلئکانالی نین وئردیگی  معلوماتا گؤره، ایران رسمیلری موناقیشه نین دایاندیریلماسینا یاردیم گؤسترمه یه حاضیر اولدوقلارینی بیان ائدیبلر. ایران خاریجی ایشلر ناظیرلیگی نین مطبوعات کاتیبی حسن قشقاوی نین وئردیگی معلوماتا گؤره، رسمی تهران طرفلر آراسیندا قانلی توققوشمادان ناراحات اولدوغونو بیلدیره رک، موناقیشه نی دایاندیرماغی و ضرر چکمیشلره یاردیم ائدیلمه سینی ایسته ییب. ایران رسمیسی همچینین بو موناقیشه نین بوتون قافقازین تهلوکه سیزلیگینه خلل گتیره جگیندن اؤز نیگارانچیلیغینی دا ایفاده ائدیب. 

ایران مئدیاسیندا ایسه جنوبی اوسئتییا موناقیشه سی یله باغلی موختلیف تحلیللر یازیلماقدادیر. بئله کی، بیر سیرا تحلیل چیلر ایران کیو (کوتلوی اینفورماسیا واسیطه لری)-اینه وئردیکلری موصاحیبه لرده جنوبی اوسئتییانین گورجوستاندان آیریلما تشببوسونون اساس سببی کیمی شیمالی اوسئتییادا یاشایان اوسئتینلرین ایقتیصادی وضعیتی نین داها یاخشی اولماسی و بو چرچیوه ده جنوبدا یاشایان اوسئتینلرین ده روسییایا بیرلشمک ایستمه لرینی گؤستریرلر. 

بعضی مطبوعات اورقانلاری ایسه موناقیشه نین سببلرینی گورجوستان و روسییادان چوخ خاریجده آختاریر. بو گؤروشو مودافیعه  ائدن ایرانلی تدقیقاتچیلار جنوبی اوسئتییا موناقیشه سینی آبش، ناتو و آب ایله روسییا آراسیندا موباریزه مئیدانی کیمی تصوور ائدیر و روسییانین سون آددیمینی کوسووونون اینتیقامی کیمی دیرلندیریرلر. تحلیل چی لر روسییا رسمیلری نین دفعه لرله کوسووونون موستقیل اولماسی حالیندا جنوبی اوسئتییانین موستقیل اولا بیله جگینی بیلدیردیگینی خاطیرلادیریرلار. بوندان باشقا، تحلیل چی لر سااکاشیویلی نین غرب یؤنلو و بیر طرفلی خاریجی سییاستی ایله غربین یاردیمینا گوونمه سی ایله  غربین گورجو لیدئری دستکله مه سینی ده موناقیشه نین آلوولانماسیندا بیر دیگر سبب کیمی گؤستریرلر. 

ایران مطبوعاتیندا بو مؤوضوع ایله باغله موختلیف فیکیرلر اولسادا، رسمی مطبوعاتین وئردیگی معلوماتلاردان بئله قناعته گلمک اولار کی، رسمی تهران رئگیوندا حربی موناقیشه نین آلوولانماسی طرفداری اولماسا دا، بو پروسئسین آب و آبش-لا روسییانین ایختیلافلاری نین درینلشمه سینه و ایرانیین نووه مسئله سینی بیر قدر آرخا پلانا کئشمه سینه خیدمت ائتمه سیندن ممنون دورلار. 

قایناق: آراز تدقیقات مرکزی